राष्ट्रिय स्वतन्त्र पार्टीका सभापति रवि लामिछानेले पार्टी जाजरकोटका सबै सदस्यलाई भूकम्प प्रभावितको उद्धार तथा राहतमा जुट्न आग्रह गरेका छन् । सामाजिक सञ्जालमा घटनाप्रति दुःख व्यक्त गर्दै उनले सरकारलाई सम्पूर्ण साधनस्रोत परिचालन गरेर उद्धार तथा राहतमा केन्द्रित हुन पनि आग्रह गरेका छन् ।
‘कार्तिक १७ गते राति जाजरकोट केन्द्रबिन्दु भएर आएको भूकम्पले ठूलो क्षति भएकोमा अत्यन्त मर्माहत छौँ । ज्यान गुमाउनेहरूप्रति हार्दिक श्रद्धाञ्जली र घाइतेहरूको उपचार र स्वास्थ्यलाभको कामना गर्दछौँ । विपद्को यो घडीमा सरकारलाई सम्पूर्ण साधनस्रोत परिचालन गरेर उद्धार तथा राहतमा केन्द्रित हुने आग्रह गर्दछौँ । साथै रास्वपा जाजरकोटका सबै सदस्यलाई उद्धार÷राहत कार्यमा सक्रियताका साथ संलग्न हुन पनि आग्रह गर्दछौँ’, उनले फेसबुकमार्फत आव्हान गरेका छन् ।
जाजरकाेटकाे रामीडाँडा केन्द्र भएर मध्यरातमा गएको भूकम्पमा जाजरकोट र रुकुम पश्चिममा मृत्यु हुनेको संख्या ७१ पुगिसकेकाे छ । एक सय ५३ भन्दा धेरै घाइते भएका छन् । शुक्रबार राति ११ बजेर ४७ मिनेटमा रामिडाँडा केन्द्रबिन्दु भएर ६.४ म्याग्निच्युडकाे भूकम्प गएको थियो ।
