सिविन–नेपालले बालबालिका सम्बन्धि फोटो प्रदर्शनी आयोजना गरेको छ । आफ्नो ३६औ वार्षिकोत्सवका अवसरमा “बालबालिका राष्ट्रिय गौरव हुन्” भन्ने अवधारणालाई अघि बढाउँदै पहिलो दिन सिविन प्राङ्गणमा र दोस्रो दिन ललितपुरको पाटन दरबार क्षेत्रमामा प्रदर्शन गरिएको हो। 
फोटो प्रदर्शनीमा बालअधिकारको संरक्षण र प्रवर्धनमा समाजमा आएको सकारात्मक परिवर्तनलाई चित्रण गर्ने प्रकारका बालबालिका सम्बन्धी ६० वटा तस्वीरहरु राखिएको थियो।
त्यस्तै, सिविन प्राङ्गणमा आयोजना गरिएको ३६औ वार्षिकोत्सव समारोहमा मानसिक अस्पताल लगनखेललाई सिविन–नेपाल राष्ट्रिय बालअधिकार सम्मान २०८०, बाट सम्मान गरिएको छ ।
कार्यक्रमका प्रमुख अतिथि राष्ट्रिय मानवअधिकार आयोगका माननीय अध्यक्ष तपबहादुर मगरले राष्ट्रिय मानव अधिकार आयोगका पूर्व सदस्य गौरी प्रधानले प्रतिपादन गर्नु भएको र सिविन लगायत नागरिक समाजका संघसंगठनका सञ्जालहरूले आत्मसाथ गरी अगाडि बढाइरहेको “बालबालिका राष्ट्रिय गौरव हुन्” भन्ने अवधारणामा मानव अधिकार आयोगको ऐक्यवद्धता रहेको बताए ।
प्रमुख वक्ताका रूपमा नेपालको बालअधिकार आन्दोलनका प्रणेता एवम् सिविन–नेपालका संस्थापक अध्यक्ष गौरी प्रधानले, सिविन–नेपालको स्थापनासँगै गति पाएको नेपालको बालअधिकार आन्दोलनबाट मुलुकमा थुप्रै उपलब्धी हासिल भएको भएता पनि राष्ट्रिय गौरव बालबालिका माथिको लगानी बढाउनु पर्नेमा जोड दिए ।
यसैगरी राष्ट्रिय बालअधिकार परिषदका उपाध्यक्ष बमबहादुर बानियाँले मुलकमा बालअधिकार अभियानलाई अझ सशक्त बनाउन सिविन जस्ता संस्थाको थप क्रियाशीलताको खाँचो औल्याँउनु हुँदै यस आन्दोलमा परिषदका तर्फबाट हरसम्भव सहयोग रहने प्रतिवद्धता जनाएका थिए ।
सिविन बालिका शान्ति गृह पशथली तथा सिविन बालगृह पनौतीका चारजना भाइबैनीहरू मेलिना, रेलीमाया, रिना र हेमन्तले एक एक मिनटको सिर्जनात्मक प्रस्तुति मार्फत बालबालिकाका समस्या उजागर गर्दै समस्या समाधानका लागि सरोकारवालाहरूलाई आह्वान गरेका थिए ।
सिविनका कार्यकारी निर्देशक सुम्निमा तुलाधरले बालसुधार गृहसम्बन्धी सिविन–नेपालको अध्ययन प्रतिवेदन मानव अधिकार आयोगका अध्यक्ष माननीय तपबहादुर मगर तथा राष्ट्रिय बालअधिकार परिषद्का उपाध्यक्ष बम बहादुर बानियाँलाई हस्तान्तरण गर्दै नेपालमा “बालअधिकार आन्दोलनका उपलब्धी तथा चुनौतीहरू” विषयमा आफ्नो धारणा राखेका थिए ।
