राजश्वको दर निर्धारण गर्न खाँडादेविमा छलफल

रामेछाप-खाँडादेवि गाउँपालिकाले आगामी आर्थिक बर्षका लागि राजश्वको दर र दायरा विस्तार गर्नेे विषयमा छलफल थालेको छ ।
गाउँपालिकाकी उपप्रमुख मखमली श्रेष्ठको अध्यक्षतामा खाँडादेविमा मंगलबार भएको बैठकमा गाउँपालिकाले हाल सम्म कायम गरेका राजश्वका दर र अवस्थाका बारेमा विश्लेषण समेत भएको थियो । छलफलमा राजश्वको दर र दायरा फराकिलो वनाउनका लागि वृहद छलफल गर्ने निर्णय समेत भएको छ ।
स्थानीय सरकार संचालन ऐन बमोजिम स्थानीय सरकारले सेवा, वस्तु र सम्पत्तिमा लगाउदै आएको कर, असुलीको अवस्था र भावि दिनमा गर्न परिवर्तन गर्न सकिने दर र दायराका विषयमा बैठकमा सुझावहरु संकलन भएका थिए । रामेछाप उद्योग वाणिज्य संघका सचिव सुरेश उदासले कोरोनाले विश्व अर्थतन्त्र आक्रान्त भएको बेला स्थानीय सरकारले नागरिक र व्यवसायीलाई उच्च करको भार लगाउनु नहुने सुझाव दिएका छन् । ‘अहिले कोरोनाले व्यवसायमा मन्दि छ, नागरिकहरु घर भित्रै छन् ’ उदासको सुझाव थियो – यस्तो अवस्थामा गत बर्ष लगाएको कर र दस्तुरमा पनि सकिन्छ भने परिमार्जन गरौं ।
गाउंपालिकाका अध्यक्ष प्रेमवहादुर तामाङले राजश्वको दर भन्दा पनि दायरा बढाउनु पर्ने वताए । उनले अहिले तोकेको दर बमोजिमको दस्तुर कडाईका साथ उठाउने हो भने मनग्ये आर्जन गर्न सक्ने अवस्था रहेको वताए । पालिकाले केहि समयमा सवै वडाहरुलाई व्यवस्थित बनाउने अभियान थालेको छ । तामाङले भने – वडामा कर्मचारीको स्थायी पूर्ति र सफ्टवेयरको निर्माण गर्ने काम सकिए पछि आम्दानी बढ्ने अवस्था छ ।
प्रमुख प्रशासकिय अधिकृत महाप्रसाद दंगालका अनुसार पालिकाले चालु आर्थिक बर्षको यो अवधि सम्म जम्मा ३३ लाख ६३ हजार ६ सय २४ रुपैया आम्दानी गरेको छ । यसमा ढुंगा गिट्टीको आम्दानी समावेश गरीएको छैन । पालिकाले आम्दानीको सवैभन्दा बढी सिफारीसबाट ८ लाख ८३ हजार र दण्ड जरीवानाबाट ८ लाख आम्दानी गरेको छ । पालिकाले डोजर र ट्यांकर, हाटकर, अन्य विक्री, उद्योग व्यवसाय दर्ता, पञ्जिकरण र भुमिकर असुल्दै आएको छ । ठुलो भूगोल ओगटेको गाउँपालिका भएपनि यस बर्ष भूमिकर भने जम्मा ३ लाख ६० हजार मात्रै असुल भएको तथ्यांकमा उल्लेख छ ।