आफूलाई राज्यले दिएको सुरक्षाकर्मी फिर्ता लैजान नेपाल कम्युनिष्ट पार्टी नेकपाका प्रवक्ता नारायणकाजी श्रेष्ठले आग्रह गरेका छन्।
सुरक्षा खतरा महशुस नगरेको उल्लेख गर्दै श्रेष्ठले राज्यको आवश्यकताका लागि सुरक्षाकर्मी क्षणभरमा फिर्ता लैजान उनले आग्रह गरेका हुन्।
सीमा सुरक्षाका लागि खटाइने सशस्त्र प्रहरीले भिआइपीको सुरक्षामा खटिने गरेको समाचार नयाँ पत्रिका दैनिकले बुधबारको अंकमा लेखेको थियो।
बुधबार नै श्रेष्ठले ट्वीट गर्दै चुनाव अघिदेखि सशस्त्रले सुरक्षा दिँदै आएको उल्लेख गरेका छन्।
‘मैले पूर्वगृहमन्त्रीले लिने गरेको गाडी र तेल सुविधा सुरूदेखि नै लिइनँ। सशस्त्र बलको पछुवा गाडी र सुरक्षाकर्मी आवश्यक नभएको ठानी केही समयपछि मैले नै जोड गरेर फर्काएँ,’ उनले भनेका छन्। आफूले नियमित रूपमा सशस्त्रको पछुवा गाडी प्रयोग नगर्ने पनि बताएका छन्।
