नुवाकोट- अत्यावश्यक खाद्यान्न ढुवानीको स्टिकर टाँसेर मदिरा ओसारपसार गरेको आरोपमा दुई जना पक्राउ परेका छन् ।
बा१९च २६४५ नम्बरको जिपमा स्टिकर टाँसी मदिरा ओसार्ने लिखु गाउँपालिका-१ ढिकुरेका गाडीधनी तथा चालक अच्युत थापामगर र वडा नं ५ थानसिङका व्यापारी दिनेश पौडेल पक्राउ परेका हुन् । उनीहरुलाई नुवाकोट जिल्ला विदुर नगरपालिका-५ गंगटेबाट प्रहरी टोलीले जाँचका क्रममा पक्राउ गरेको हो ।
प्रहरीका अनुसार ५२ कार्टुन ओल्ड दरबार, तारा लगायतका विभिन्न ब्राण्डका मदिरा गाडीबाट बरामद गरिएको छ । सो मदिरा व्यापारी पौडेलको पसलका लागि लैजाँदै गरेको पाइएको जिल्ला प्रहरी कार्यालयका सूचना अधिकारी राजेश थापाले बताए । मदिरा विदुर नगरपालिका-१ ढुंगेस्थित डीपी सप्लार्यसबाट खरिद गरेको र सोको मूल्य साढे ४ लाख रुपैयाँ पर्ने प्रहरीले जनाएको छ ।
