काठमाडौं – सुनको भाउ प्रतितोला ८६ हजार १ सय रुपैयाँ पुगेको छ। नेपाल सुनचाँदी रत्न तथा आभूषण महासंघले दुई महिनापछि नेपाली बजारमा सुनचाँदीको मूल्य निर्धारण गरेको हो । गत चैत ११ गतेबाट सरकारले बन्दाबन्दी घोषणा गरेपछि नेपालका सुनचाँदी विक्रेताहरूले सुनको मूल्य निर्धारण गर्न बन्द गरेका थिए। यसबीचमा अन्तर्राष्ट्रिय बजारमा सुनको मूल्य निकै उतारचढाव आइसकेको भए पनि नेपाली बजारमा भने यसको मूल्यांकन हुन नसक्दा अन्यौलता बढेको नेपाल सुनचाँदी रत्न तथा आभूषण महासंघले जनाएको छ।
बन्दाबन्दी सुरु हुनुअघि १० चैतमा प्रतितोला ७७ हजार रुपैयाँ तोकिएको थियो। यसरी नेपाली बजार बन्द हुँदै गर्दा सुनको भाउ नौ हजारभन्दा धेरैले महँगिइसकेको छ। यो मूल्य नेपाली बजारमा प्रकाशित मूल्यमध्ये हालसम्मकै उच्च पनि हो।
कोरोना भाइरस संक्रमणको महामारीले सुरुवाती समयमा सुनको मूल्य ओरालो लागेको थियो। त्यसबेला प्रतिऔंश १७०३ अमेरिकी डलरसम्म पुगेको सुनको भाउ १० दिनपछि १४६४ डलरमा झरेको थियो। उक्त न्यूनतम विन्दुमा झरेको भोलिपल्ट बाउन्सब्याक भएर सुनको मूल्य प्रतिऔंश १४९८ डलरमा उक्लिएको थियो। सोही मूल्यलाई आधार मानेर नेपाली बजारमा १० चैतको मूल्य निर्धारण भएको थियो।
