काठमाडौँ – नेकपा एमालेका नेता एवम् पूर्वमन्त्री लालबाबु पण्डितले माधव नेपाल सम्मिलित नेपाली कांग्रेस नेतृत्वको विपक्षी गठबन्धन समाप्त गर्ने योजनासहित बनाइएको दाबी गरेका छन्।
उनले सामाजिक सन्जाल लेख्दै यो गठबन्धन समाप्त गर्नको लागि हो यसमा एमालेका कोहि नेता रनभुलमा नपर्न आग्रह गरेका छन्।
‘अहिले नेपाली कांग्रेसको नेतृत्वमा बनेको गठबन्धन नेकपा एमालेलाई कमजोर बनाई समाप्त गर्नका लागि हो’, उनले भनेका छन्, ‘नेकपा एमालेका कोही नेता रनभुलमा आफ्नो घरमा आगो लगाएर खुसियालीमा नरमाऊ।’
उनले यस्तो कदम नसच्याए इतिहासले धिक्कार्ने पनि बताएका छन्। ‘यस्तो कामलाई इतिहासले धिक्कार्नेछ’, उनले भनेका छन्, ‘पछि आँसु पुछ्नेवाला कोही नभेटिएला। नेपालको जय होस् नेकपा एमालेको जय होस्।’
एमाले मिल्ने दिशातर्फ अघि बढिरहेका बेला सोमबार दिउँसो एमालेका असन्तुष्ट नेता माधवकुमार नेपालको घरमा कांग्रेस सभापति शेरबहादुर देउवा र माओवादी अध्यक्ष पुष्पकमल दाहाल प्रचण्डसहितको बैठक बसेपछि लालबाबुले यसो भनेका हुन्।
तत्कालीन नेकपामा विवाद देखिँदा सुरुमा लालबाबु पनि माधव नेपाल समूहमै थिए। तर उनले एमाले विभाजनको पक्षमा आफू नलाग्ने भन्दै संस्थापनमै रहँदै आएका छन्।
