काठमाडौं – संयुक्त राष्ट्र सङ्घको आह्वानमा लिवियामा सञ्चालित शान्ति स्थापना मिसनमा तैनाथ नेपाली शान्ति सैनिकहरूको अदलीबदली गरिएको छ।
नेपाली सेनाका अनुसार, लिवियास्थित संयुक्त राष्ट्र सङ्घीय सहयोग मिसन (UNSMIL) अन्तर्गत कार्यरत श्री नयाँ भैरवीदल गुल्म (शा.से.) सातौँ डफ्फालाई प्रतिस्थापन गर्न श्री गुरूबक्स गुल्म (शा.से.) आठौँ डफ्फाका ४२ जना नेपाली शान्ति सैनिकहरूको पहिलो टोली बिहिबार मिसन क्षेत्रतर्फ प्रस्थान गरेका हुन् ।
त्यसैगरी, उक्त मिसनमा आफ्नो कार्यकाल सफलतापूर्वक सम्पन्न गरेका ६१ जना नेपाली शान्ति सैनिकहरू आजै स्वदेश फिर्ता भएका छन्।
हाल लिवियास्थित उक्त शान्ति स्थापना मिसनमा नेपाली सेनाका २१३ जना शान्ति सैनिकहरू कार्यरत रहेका छन्। नेपाली सेना संयुक्त राष्ट्र सङ्घको शान्ति स्थापना अभियानमा सक्रिय सहभागिता जनाउँदै विश्व शान्ति, स्थायित्व तथा सुरक्षा प्रवर्द्धनमा महत्वपूर्ण योगदान पुर्याउँदै आएको छ।
