काठमाडौं – रामेछाप – काठमाडौं पत्रकार समाजको अध्यक्षमा प्रेम गौतम सर्वसम्मत निर्वाचित भएका छन् । शंखमुलस्थित ‘एवान क्याफे एण्ड ब्याङ्क्वेट’मा शनिबार भएको पहिलो साधारण सभा तथा अधिवेशनमा गौतमको अध्यक्षतामा नयाँ कार्यसमिति चयन गरेको घोषणा गरेको हो ।
समाज रामेछापबाट काठमाडौं आएर पत्रकारितामा संलग्न व्यवसायिक पत्रकारहरूको साझा संस्था हो । २०७३ साल असोज १ गते पत्रकारहरू भेला भई समाज गठनको निर्णय भएको थियो । २०७४ पुस २४ गते जिल्ला प्रशासन कार्यालय काठमाडौंमा दर्ता भएको समाज तदर्थ समितिको भरमा चल्दै आएको थियो ।
समाजको उपाध्यक्षमा कमलाकुमारी बिक, महासचिवमा दीपेन्द्र गुरुङ, सचिवमा प्रज्वल पौडेल र कोषाध्यक्षमा यसिमा महत चुनिएका छन् । यस्तै सम्झना श्रेष्ठ, दुर्गा खड्का र अनिश मिजार सदस्यमा चयन भएका छन् ।
साधारण सभाले तत्कालीन महासचिवको महासचिव प्रगति प्रतिवेदन र कोषाध्यक्षको आर्थिक प्रतिवेदन पारित गरेको थियो । कार्यसमितिको कार्यकाल दुई वर्षको हुनेछ । नवनिर्वाचित अध्यक्ष गौतमले समाजलाई रहर लाग्दो र भरपर्दो संस्थाको रुपमा विकास गर्ने बताए ।
