राष्ट्रिय जनता पार्टी नेपालले नागरिकता खारेज गर्ने निर्णय सार्वजनिक गर्दा सरकारले गैरजिम्मेवार भूमिका खेलेको आरोप लगाएका छन्।
सूचना तथा सञ्चारमन्त्रीसमेत रहेका सरकारका प्रवक्ता गोकुलप्रसाद बाँस्कोटाले नेपाली नागरिकता लिने भारतीय नागरिकको नागरिकताको खारेज गरेको सन्दर्भमा उक्त आरोप लगाएका हुन्।
‘सञ्चारमन्त्रीले राजेन्द्र महतोलगायतको नागरिकता खारेज गरेको सार्वजनिक गर्नुभयो तर कुन राजेन्द्र महतो हो? त्यो खुलाउनु भएन,’ महतोले प्रतिनिधिसभा बैठकमा भने, ‘राष्ट्रियता जस्तो संवेदनशिल विषयमा पुरै विवरण नदिएर भ्रमको खेती गर्ने काम ग¥यो, यो खेदजनक छ।’
नाम जुध्दा आफूलाई अप्ठयारो परेको जनाउँदै मन्त्रिपरिषद निर्णय सार्वजनिक गर्दा संवेदनशिल हुन पनि महतोले आग्रह गरेका छन्। नागरिकता खारेज हुनेको पूर्ण विवरण सार्वजनिक नगरेर सरकारले नियत खराब गरेको महतोको आरोप छ।
‘कुन व्यक्ति हो? राजेन्द्र महतो त यहाँ हजारौं छन्’ महतोको दुखेसो छ, ‘सञ्चारमाध्यमले पनि कुरै नबुझि समाचार लेखेका छन् तर पछि गृहमन्त्रालयका एक अधिकारीले अर्कै राजेन्द्र महतो भनेर स्पष्टीकरण दिएको देखियो।’ उनले सो बारेमा समयमा नै स्पष्ट जानकारी नदिदाँ आफूमाथि मानहानी भएको बताए।
एउटा व्यक्तिलाई अर्कै व्यक्तिसँग जोडेर सञ्चारमाध्यमले गैर जिम्मेवारपूर्ण भूमिका खेलेको पनि उनको गुनासो छ। ‘अब यस्तो क्रियाकलाप बन्द हुनुपर्छ, यसमा सरकारले माफी माग्नुपर्छ’ उनको माग छ। आफ्नो चरित्र हत्या गराउने उद्देश्यले अनर्गल प्रचार गरिएकोप्रति सञ्चारमाध्यमसँग उनले संसदमा रोष प्रकट गरेका छन्।
