सशस्त्र प्रहरीको अतिरिक्त महानिरीक्षक (एआईजी) मा बढुवाका लागि नारायणदत्त पौडल सिफारिस भएका छन्। बुधबार बसेको बढुवा समितिको बैठकले रिक्त एक एआईजीमा पौडेललाई बढुवा गर्ने निर्णय गरेको बढुवा समितिका सदस्य सचिव सशस्त्र प्रहरी महानिरीक्षक राजु अर्यालले जानकारी दिए।
एआईजी रामशरण पौडेल वैशाख १९ गतेबाट अनिवार्य अवकाशमा गएपछि एक एआईजी रिक्त भएको थियो। रिक्त एआईजीमा वरीयतामा अगाडी रहेका डीआईजी पौडेल सिफारिस भएका हुन्।
एआईजीमा सिफारिस भएसँगै भावी आईजीपीका लागि उनको संभावना बढि भएको हो। उनी सशस्त्रमा हाल रहेका सबै डीआईजी भन्दा अगाडिका हुन्। २०५४ साल चैत १८ गते प्रहरी निरीक्षकमा भर्ना भएका पौडेल पछि सशस्त्र प्रहरीमा गएका थिए।
सशस्त्र प्रहरीतर्फ प्रवेश गरेसँगै उनी स्वतः एक पद बढुवा हुँदै डीएसपी भएका थिए। पौडेल हालका आईजीपी अर्यालसँगै प्रहरी सेवामा प्रवेश गरेर डीआईजीसम्म बढुवा भएका हुन्। तर वरीयतामा अगाडि रहेका अर्याललाई सरकारले १५ दिन पहिले नै एआईजीमा बढुवा गरेको थियो। अर्याल अब चार वर्षे पूरा कार्यकाल सशस्त्रको आईजीपी हुने छन्। उनको अवकाशपछि पौडेल २२ महिना सशस्त्र प्रहरीको नेतृत्व गर्न पाउनेछन्।
सशस्त्रमा हाल अर्को पनि एआईजी रिक्त भएको छ। राजु अर्याल आईजीपीमा बढुवा भएसँगै रिक्त भएको एआईजीमा भने बढुवा सिफारिस गरिएको छैन। केही दिनमै बढुवा हुने गृह स्रोतले जनाएको छ। यो पदमा चन्द्रप्रकाश गौतमलाई बढुवा गर्ने संभावना छ। गौतम २०५२ सालमा नेपाली सेनामा भर्ना भएका हुन्। उनी सेना छाडेर सशस्त्र प्रहरीतर्फ प्रवेश गरेका थिए।
उनी राजु अर्याल आईजीपी हुँदै २०८२ वैशाखमा अवकाश हुने भएकाले नारायणदत्त पौडेलको आईजीपी हुने लगभग निश्चित भएको हो। अर्याल २०८३ वैशाख १८ गतेसम्म आईजीपी हुनेछन्।
अर्याल चार वर्षे कार्यकालका कारण अवकाशमा जाँदै उनकै ब्याची पौडेल भने एआईजी नै रहने छन्। र उनको एआईजीको कार्यकाल पनि बाँकी नै रहने छ। त्यसपछि २०८३ वैशाख १९ गतेदेखि २०८४ चैत १८ गतेसम्म पौडेल आईजीपी हुनेछन्।
