प्रधानसेनापति प्रभुराम शर्मा आगामी असार ४ गते नेपाली शान्ति सैनिक तैनाथ दुई मुलुकको भ्रमणमा जाने भएका छन् । साताव्यापी भ्रमणका लागि उनी लेबनान र सिरिया जाने भएका हुन् ।
द्वन्द्वग्रस्त क्षेत्रमा शान्ति स्थापनार्थ तैनाथ फौजको हौसला अभिवृद्धि गर्न तथा राष्ट्रसंघीय मिसनको विविध पक्ष एवं भावी योजनाका बारेमा जानकारी हासिल गर्ने उद्देश्यका साथ प्रधानसेनापति शर्मा ती मुलुकको भ्रमणमा जान लागेको जनसम्पर्क तथा सूचना निर्देशनालय, जङ्गी अड्डाले जनाएको छ ।
असार १० सम्म हुने भ्रमणका क्रममा प्रधानसेनापति शर्मा लगायत भ्रमण टोलीले ती मिसनहरुको वस्तुस्थिति, अपरेशनल गतिविधि, फौज तैनाथीको अवस्था लगायत अन्य विविध पक्षका बारेमा जानकारी लिई ती राष्ट्र तथा शान्ति मिसनका उच्च पदस्थ अधिकारीहरुसँग भेटघाट गर्ने जनाइएको छ ।
यस प्रकारको निरीक्षण भ्रमणबाट द्वन्द्वग्रस्त क्षेत्रमा तैनाथ फौजको हौसला अभिबृद्धि हुनुको साथै उच्च पदस्थ अधिकारीहरुसँगको भेटघाटबाट द्विपक्षीय आपसी हित तथा पारस्परिक सम्बन्ध थप वृद्धि हुने विश्वास नेपाली सेनाले लिएको निर्देशनालयले जनाएको छ ।
यसैबीच निरीक्षण भ्रमण पश्चात प्रधानसेनापति शर्माले असार १३ देखि १७ गतेसम्म अमेरिकाको भ्रमण गर्ने जनाइएको छ । अमेरिकाको औपचारिक निमन्त्रणामा भ्रमण हुन लागेको निर्देशनालयले जनाएको छ ।
निर्देशनालयका अनुसार उच्चस्तरीय सैनिक नेतृत्वबाट नियमित रुपमा हुने गरेको यस प्रकारको भ्रमण विगत लामो समयदेखि स्थापित नेपाली सेना र अमेरिकी सेना लगायत दुई देशबीचको मैत्रीपूर्ण सम्बन्ध एवं विद्यमान द्विपक्षीय सहयोग तथा सहकार्यको क्षेत्रलाई थप व्यवस्थित र प्रभावकारी बनाउन महत्वपूर्ण सावित हुने विश्वास नेपाली सेनाले लिएको छ ।
