काठमाडौं – नेपाली सेनाको आयोजना तथा नेपाल टेनिस सङ्घको प्राविधिक सहयोगमा सञ्चालित ‘प्रधान सेनापति राष्ट्रिय खुला टेनिस प्रतियोगिता–२०८३’ को चौथो संस्करण सम्पन्न भएको छ ।
जङ्गी अड्डामा आयोजित समापन समारोहमा प्रधान सेनापति अशोक राज सिग्देलले प्रतियोगितामा ‘च्याम्पियन’ बनेको त्रिभुवन आर्मी क्लब तथा पुरुष र महिला एकलतर्फका विजेता क्रमशः प्रदीप खड्का र सिभाली गुरुङलाई ट्रफी तथा प्रमाणपत्र प्रदान गर्नुभयो ।
प्रतियोगिताअन्तर्गत विभिन्न विधामा उत्कृष्ट प्रदर्शन गर्ने खेलाडीहरूलाई पनि पुरस्कार वितरण गरिएको थियो । जेठ ४ गतेदेखि सुरु भएको प्रतियोगिता जङ्गी अड्डा र दशरथ रङ्गशालास्थित टेनिस कोर्टमा सञ्चालन गरिएको थियो । प्रतियोगितामा १२ वटा क्लबका २१८ जना खेलाडीले १३ विधामा प्रतिस्पर्धा गरेका थिए ।
समापन समारोहमा बलाधिकृत, तीनवटै सुरक्षा निकायका प्रमुख, रथीवृन्द, नेपाल टेनिस संघ तथा राष्ट्रिय खेलकुद परिषद्का पदाधिकारी, विभिन्न टेनिस क्लबका प्रतिनिधि, नेपाली सेनाका सकलदर्जा, सञ्चारकर्मी तथा खेलाडीहरूको उपस्थिति रहेको थियो।
