विराटनगर – जनता समाजवादी पार्टी, नेपाल ले कोशी प्रदेशसभा सदस्य निर्मला लिम्बू माथि कारबाही प्रक्रिया अघि बढाउने तयारी गरेको छ। अशोक राई नेतृत्वको ‘समाजवादी पार्टी’मा सनाखत गरेको भन्दै जसपा नेपालले उनलाई सांसद पदबाट पदमुक्त गर्ने तयारी थालेको हो।
जसपा नेपालका अनुसार नयाँ पार्टीमा सनाखत गरेपछि नैतिक आधारमा सांसद लिम्बूले राजीनामा दिनुपर्ने हुन्छ। त्यसो नगरे कानुनी प्रक्रिया अनुसार सांसद पदबाट हटाउने प्रक्रिया अघि बढाइने नेताहरूले बताएका छन्।
यसअघि नेपालको सर्वोच्च अदालत ले उपेन्द्र यादव नेतृत्वको जसपा नेपाललाई आधिकारिकता दिएको थियो। त्यसपछि लिम्बूमाथि कारबाही प्रक्रिया अघि बढाइएको बताइएको छ। समानुपातिक निर्वाचन प्रणालीबाट प्रदेशसभा सदस्य बनेकी लिम्बू स्वास्थ्य मन्त्रीसमेत बनेकी थिइन्।
यता लिम्बूले भने आफू नयाँ पार्टीमा नगएको र पार्टी हितविपरीत कुनै काम नगरेको दाबी गरेकी छन्। आफूविरुद्ध कारबाही गरिए कानुनी उपचार खोज्ने उनको भनाइ छ।
