काठमाडौँ – नेकपा एमालेको दशौँ महाधिवेशनबाट एमाले अध्यक्षमा केपी शर्मा ओलीकै टिम निर्वाचित भएको छन् । ओली दोस्रो कार्यकालका लागि निर्वाचित भएका हुन् । सर्वसम्मत हुने ओलीको आंकाक्षामा भीम रावलले चुनौती खडा गरेपछि उनी महाधिवेशनमा मंगलबार भएको मतदानबाट बहुमतले विजयी भएका हुन् ।
२०७१ सालमा भएको एमालेको नवौं महाधिवेशनबाट पहिलो पटक अध्यक्ष बनेका ओली २०७५ सालमा माओवादी केन्द्रसँग भएको पार्टी एकतापछि पनि निरन्तर अध्यक्ष नै थिए । एमाले र माओवादी केन्द्रको एकता गत वर्ष फागुनमा अदालतको आदेशका कारण भंग भएपछि एमालेले १०औं महाधिवेशन गरेको हो ।
यो महाधिवेशनमा ओली सर्वसम्मत अध्यक्ष बन्न चाहन्थे । पार्टीभित्र विभिन्न मनोविज्ञानका नेताहरू रहेकाले तीनलाई व्यवस्थापन गर्न भन्दै ओलीले केन्द्रीय कमिटी नै आफूले प्रस्तावित गरे ।
शनिबारको बन्दसत्रबाट प्राप्त अधिकार अनुसार आइतबार रातिको बन्दसत्रमा ओलीले प्रस्तुत गरेको सूची अनुसारकै पदाधिकारीहरु मंगलबार निर्वाचित भएका छन्।
अध्यक्षमा ओली निर्वाचित हुँदा, वरिष्ठ उपाध्यक्षमा ईश्वर पोखरेल र उपाध्यक्षमा युवराज ज्ञवाली, अष्टलक्ष्मी शाक्य, सुरेन्द्र पाण्डे, रामबहादुर थापा बादल, विष्णु पौडेल र सुवास नेम्वाङ निर्वाचित भएका छन् ।
त्यस्तै, महासचिवमा शंकर पोखरेल, उपहासचिवमा प्रदीप ज्ञवाली, पृथ्वीसुब्बा गुरुङ, विष्णु रिमाल र सचिवमा टोपबहादुर रायमाझी, रघुवीर महासेठ, छविलाल विश्वकर्मा, लेखराज भट्ट, योगेश भट्टराई, गोकर्ण विष्ट र पद्मा अर्याल निर्वाचित भएका छन् ।
ओलीको सूचीलाई चुनौति दिँदै अध्यक्षमा भीम रावल र उपाध्यक्षमा घनश्याम भुसालले उम्मेदवारी दिएका थिए। त्यस्तै सचिवमा भीम आचार्य र टंक कार्कीले उम्मेदवारी दिएका थिए। उनीहरु सबै पराजित भएका हुन्।
नेकपा एमालेको आज निर्वाचित हुने नयाँ कार्यसमितिले आजै शपथ लिने भएको छ । निर्वाचित हुने पदाधिकारी र केन्द्रीय सदस्यहरुले आजै शपथ लिने भएका हुन् ।
मतपरिणाम आएपछि विजयी नेताहरुलाई आजै सपथ ग्रहण गराउने तयारी आयोगको छ । नयाँ केन्द्रीय कमिटीको बैठक आजै बस्ने छ ।
अध्यक्ष, उपाध्यक्ष, सचिव र सदस्यहरुका लागि निर्वाचन भएको थियो । महाधिवेशनबाट वरिष्ठ उपाध्यक्ष, महासचिव र उपमहासचिवहरु निर्विरोध चयन भइसकेका छन् । एमालेको १० गतेदेखि चितवनमा जारी १० औं महाधिवेशन आजबाट सकिँदैछ । दुई दिनका लागि तय भएको महाधिवेशन चार दिनसम्म लम्बिएको थियो ।
