काठमाडौं – ऐतिहासिक धरहराको पुनःनिर्माण कार्य पूरा भएको छ । धरहराको वैशाख ११ गते ११ः०० बजे प्रधानमन्त्री केपी शर्मा ओलीले उद्घाटन गर्ने कार्यक्रम रहेको छ।
भूकम्पले भत्काएको संरचना पुनःनिर्माण भए पनि अन्य केही संरचना निर्माणको काम सम्पन्न नभएकाले तत्काल सर्वसाधारणका लागि खुला हुने छैन । त्यसका लागि आगामी मङ्सिरसम्म समय लाग्ने बताइएको छ ।
धरहराको २०औं तलामा दृश्यावलोकन गर्ने व्यवस्था मिलाइएको छ । २२औं तलामा शिव लिंग राखिनेछ । धरहराको हरेक तलामा कार्नेसका बुट्टा र पुरानै शैलीको गोला झ्यालहरु राखिएको छ ।
धरहरामा लिफ्टको पनि व्यवस्था गरिएको छ। धरहराको पुनर्निमाणको काम लगभग अन्तिम चरणमा रहेको निर्माण कम्पनीले जनाएको छ।
विसं २०७२ को विनाशकारी भूकम्पबाट धरहरा ध्वस्त भएको थियो । भूकम्प गएको तीन वर्षपछि मात्रै यस सम्पदाको पुनःनिर्माणको कामले गति लिएको हो । गोरखा भूकम्पले ढलेको धरहरा पुनःनिर्माणको प्रधानमन्त्री ओलीले विधिवत् रुपमा २०७५ पुस १२ गते उद्घाटन गरेका थिए ।
१८८१ मा तत्कालिन प्रधानमन्त्री भीमसेन थापाले ११ तलाको धरहरा बनाएका थिए । तर, १९९० को महाभूकम्पले २ तला भत्किएपछि ९ तलामा सिमित थियो । ०७२ को भूकम्पले धरहरा फेदैबाट ढल्न पुग्यो ।
