नेकपा राष्ट्रिय एकता अभियानका संयोजक तथा राष्ट्रिय सभाका सदस्य वामदेव गौतमले समाजवादी केन्द्र निर्माणमा धेरै ढिलाइ गर्न नहुने बताएका छन्।
माओवादी केन्द्रका अध्यक्ष पुष्पकमल दाहाल ‘प्रचण्ड’सँग सोमबार सिंहदरबारस्थित माओवादीको संसदीय दलमा भएको भेटमा गौतमले प्रचण्डलाई समाजवादी केन्द्र छिटो बनाउन आग्रह गरेका हुन्।
भेटबारे जानकारी दिँदै उनले भने, ‘समाजवादी केन्द्र निर्माणमा वामपन्थी घटक सहमत भएको परिस्थितिमा यसलाई पूर्णता दिन ढिलाइ नगरौं भन्ने कुरा राखें,’ उनले भने।
छलफलमा प्रचण्डले शीर्ष नेताहरूबीच छिट्टै छलफल राखेर सफल बनाउने प्रतिवद्धता व्यक्त गरेको गौतमले बताए। यसका निम्ति अब छिट्टै संयोजन समितिलाई पूर्णता दिइने कुरा भएको गौतमको भनाइ छ।
‘पार्टीगत प्रतिनिधित्व हुने संयोजन समितिलाई पूर्णता दिन ढिला नगर्ने कुरा भयो। एउटै चुनाव चिन्हमा लड्ने गरी अघि बढ्ने तयारी छ,’ गौतमले भने।
मुलुकमा अब प्रजातान्त्रिक समाजवादी र वामपन्थी समाजवादी हुने गौतमले बताए। ‘राजनीति अब प्रजातान्त्रिक समाजवादी र वामपन्थी समाजवादीमा ध्रुवीकरण हुन्छ। एउटाको नेतृत्व कांग्रेसले र अर्को खेमाको नेतृत्व हामीले गर्नका निम्ति समाजवादी केन्द्र निर्माण गर्न लागेका हौं,’उनले भने।
एमाले अध्यक्ष केपी शर्मा ओली समाजवादी केन्द्रमा सामेल नहुने उनले बताए। ‘यो समाजवादी केन्द्र हो। उहाँको विचार समाजवादीसँग मिल्दैन, त्यसैले आउनु हुन्न। यो विचारसँग सहमत हुनुभयो भने उहाँलाई समावेश गर्न कुनै आपत्ति छैन,’ गौतमले भने।
