पाँचथर- पाँचथरको फालेलुङ ४ चाररातेमा ७ औँँ अन्तराष्ट्रिय चौँरी महोत्सव सम्पन्न भएको छ। नयाँ बर्षको अवसरमा आन्तरिक पर्यटन तथा बाहिय पर्यटन भित्र्याउने उद्देश्यले फालेलुङ गाउँपालिकाको सहकार्यमा नेपाल पत्रकार महासँघ, फालेलुङ कञ्चनजङ्घा पर्यापर्यटन प्रवर्द्धन संस्था र दीप ज्योती युवा क्लब सहितका सङ्घ संस्थाले आयोजना गरेका हुन् ।
समुन्द्री सतहबाट ३४५० मीटर उचाइमा अवस्थित फालेलुङ गाउँपालिका –४ चाररातेमा प्राकृतिक रमणीय दृश्यहरुले भरिपूर्ण रहेको आफैमा सुन्दर पहाडी भु–भाग हो । जुन भारतको सीमानासँग जोडिएको छ । जहाँबाट सूर्योदय सूर्यास्तसँगै कञ्चनजङ्घा र कुम्भकर्ण हिमश्रीङ्खलाहरू देख्न सकिन्छ ।
हिमालको पर्यायका रूपमा स्थापित चौरी गाई र तिनका प्रजातिको संरक्षणसँगै चौरीजन्य उत्पादनहरूको प्रवर्धन र बजारीकरण गर्ने उद्देश्यले महोत्सव आयोजना गरिएको आयोजकले जनाएको छ ।
महोत्सवमा सयभन्दा धेरै चौँरी र याक प्रदर्शनीमा रहेको थियो । योसँगै स्थानीय क्षेत्रमा उत्पादित चौरीका दूधजन्य उत्पादनहरुसंगै साँकृतिक कार्यकम पनि आयोजना गरिएको थियो । आन्तरिक र बाह्य गरी दुई हजारभन्दा बढी पर्यटकले महोत्सव अवलोकन गरेका छन् ।
चौरी पर्यटन महोत्सव अवलोकन गर्न आन्तरीक साथै भारत र सिक्किमबाट समेत पर्यटकहरुको बाक्लो उपस्थिति रहेको थियो । चौरी पर्यटन महोत्सव आयोजनाले चौरी पाल्ने कृषकहरुमा समेत चौरीपालन प्रति आकर्षण बढाएको छ ।
