काठमाडौँको बुढानीलकण्ठ शिवपुरी-बिष्णुद्वार-पदयात्राको गन्तव्य पुरानै भएता पनि हाल यसको चर्चा दिनप्रतिदिन बढ्दो रहेको छ । आजभोलि बिदाका दिनमा विष्णुद्वारसम्म हाइकिङ गर्ने वा पदयात्रा गर्नेहरूको लर्को पनि धेरै नै बढेको छ ।
विशेष गरी विष्णुद्वारको भित्री जङ्गली दृश्य, झरना, ढुङ्गाहरूबीच लुकामारी खेल्दै बग्ने पानीमा रम्न कै लागि भनेर टाढा टाढा देखि आगन्तुकहरू आउने गरेका छन्।
शिवपुरी राष्ट्रिय निकुञ्जमा पर्ने विष्णुद्वार धार्मिक स्थल तथा पर्यावरण पर्यटनका लागि परिचित छ । प्रकृतिको आनन्द लिँदै पदयात्रा गर्न चाहनेहरूका लागि बिष्णुद्वार उत्कृष्ट गन्तव्य हो ।
नारायणस्थानबाट शिवपुरी राष्ट्रिय निकुञ्ज हुँदै ६ किमिको यात्रा तय गरेपछि विष्णुद्वार पुगिन्छ । विष्णुद्वार प्रवेशका लागि सैनिक ब्यारेकमा प्रतिव्यक्ति प्रवेश शुल्क १०० रुपैयाँ तिर्नुपर्छ । 
