तिम्बुङ ट्रेल रनमा पाँचथर फिदिम–१४ का विशाल राई प्रथम भएका छन् । ४ हजार ३ सय ३५ मीटर उचाइमा रहेको पाँचथरको तिम्बुपोखरी क्षेत्रमा आयोजना भएको दौडमा ३० जनाको सहभागिता रहेको थियो । ७ दशमलव ८ किलोमीटरको दौड तिम्बुङ पोखरीदेखि पाङदुवासम्म भएको थियो ।
भातरको सिक्किमका पिङ्सो नाम्ग्याल भाटियाले दोस्रो स्थान हासिल गरे भने ताप्लेजुङको कालिखोलाका भरत बानियाँले तेस्रो स्थान हासिल गरे ।
पहिलो, दोस्रो र तेस्रोले क्रमशः ३० हजार, २० हजार १० हजार रुपैँया नगदसहित ट्रफी प्राप्त गरे । सहभागीमध्ये महिलातर्फ पहिलोपल्ट यो दूरी पार गर्ने पाँचथरको फाल्गुनन्द गाँउपालिकाकी निक्की नेम्वाङलाई १० हजार नगद पुरस्कार प्रदान गरिएको थियो ।
तिम्बुङ पोखरी क्षेत्रको प्रवर्द्धनका लागि पहिलोपल्ट ट्रेल रनको आयोजना गरिएको पोखरी संरक्षण समितिका अध्यक्ष याम बहादुर बानियाँले जानकारी दिए । पूर्वको चर्चित पर्यटकीय गन्तव्य तिम्बुङ पोखरी क्षेत्रमा पर्यटक आकर्षित गर्न यो दौड राखिएको थियो । पछिल्ला बर्षहरुमा यहाँ आउने आन्तरीक पर्यटकको संख्यामा बढोत्तरी भएको पर्यटन व्यवसायी अमिर राईले जानकारी दिए ।
