काठमाडौं – महाशिवरात्रिको पूर्वसन्ध्यामा भारतबाट आएका नागा बाबाहरुले आज पशुपतिनाथ क्षेत्रको परिक्रमा गरेका छन्। परम्परागत रूपमा हरेक वर्षझैं यस वर्ष पनि उनीहरूले परिक्रमा गर्दै तरबार तथा लाठी कलाको प्रदर्शन समेत गरेका थिए।
भारतबाट साधु-सन्तहरु आउने क्रम जारी रहेको छ। पशुपति क्षेत्र विकास कोषका अनुसार यस वर्ष करिब ५ लाख भक्तजनले पशुपतिनाथ मन्दिरमा दर्शन गर्ने अनुमान गरिएको छ।
शिवरात्रिको सफल व्यवस्थापनका लागि कोषले १ करोड ५० लाख रुपैयाँको बजेट विनियोजन गरेको छ। साथै, ४ हजार स्वयंसेवक परिचालन गर्ने योजना बनाइएको छ।
शिवरात्रिको दिन पशुपतिनाथ मन्दिरमा भक्तजनहरूको ठूलो भीड लाग्ने भएकाले सुरक्षा र व्यवस्थापनलाई ध्यानमा राख्दै विभिन्न तयारी तीव्र पारिएको कोषले जनाएको छ।
