सिन्धुली, फिक्कल — सिन्धुली जिल्लाको फिक्कल गाउँपालिका–५ मा अवस्थित फिक्कल डाँडा पर्यटकीय गन्तव्यको रुपमा चर्चा बढ्दै गएको छ। समुद्री सतहबाट २,३८८ मिटरको उचाइमा रहेको यो डाँडा सिन्धुली जिल्लाको सबैभन्दा अग्लो शिखर हो।
फिक्कल डाँडाबाट विश्वकै सर्वोच्च शिखर सगरमाथा सहितका विभिन्न हिमशृङ्खला, महाभारत र तराईका समथर भूभागहरू समेत एकसाथ अवलोकन गर्न सकिन्छ। बिहान र बेलुका यहाँबाट देखिने सूर्योदय र सूर्यास्तका दृश्यहरू अत्यन्त आकर्षक मानिन्छन्।
पर्यटकलाई लक्षित गरी डाँडाको फेदीमा रहेको चनौटे गाउँमा होमस्टे सेवा सञ्चालनमा ल्याइएको छ। यहाँको स्थानीय संस्कृति, परिकार र पाहुना सत्कारले पर्यटकहरू आकर्षित हुने गरेका छन्। चनौटे गाउँबाट करिब दुई घण्टा पैदल हिँडेर फिक्कल डाँडा पुग्न सकिन्छ। बाटोभरि हरियाली जंगल र रमणीय दृश्यहरूले यात्रालाई थप रोमाञ्चक बनाउँछ।
स्थानीयवासीका अनुसार पछिल्लो समय आन्तरिक पर्यटकहरूको आवागमन बढ्दै गएको छ। स्थानीय सरकारले पनि फिक्कल डाँडालाई पर्यटकीय गन्तव्यका रूपमा प्रवर्द्धन गर्न योजना बनाउँदै आएको छ। 
