दोलखा – मनमोहक प्राकृतिक सौन्दर्य र सूर्योदय–सूर्यास्तका मनोहर दृश्यका लागि प्रसिद्ध दोलखाको सैलुङ अहिले आन्तरिक पर्यटकले भरिएको छ। विशेष गरी बिदाको अवसर र अनुकूल मौसमका कारण यहाँ दैनिक रूपमा घुम्न आउनेको भीड बढेको स्थानीयहरू बताउँछन्।
२,९०० मिटर उचाइमा अवस्थित सैलुङबाट हिमालका श्रृङ्खलादेखि हरियाली पहाड, फाँट र बादलमाथिको दृश्यावलोकन गर्न सकिने भएकाले पछिल्ला वर्षहरूमा यो गन्तव्य लोकप्रिय बन्दै गएको छ। बिहानैदेखि पर्यटकहरू पहाडी ढुंगा–डाँडाहरूमा चढ्दै फोटोग्राफी, भिडियो निर्माण र समूहिक भ्रमणमा रमाइरहेका देखिन्छन्।
स्थानीय पर्यटन व्यवसायीका अनुसार पर्यटकको भीडसँगै होटेल, होमस्टे र स्थानीय उत्पादनको बिक्रीमा समेत उल्लेख्य वृद्धि भएको छ। सैलुङ पुग्ने सडक स्तरोन्नति हुँदै जानु र प्रचार–प्रसार बढ्नु यस गन्तव्यलाई अझ आकर्षक बनाएको बताइन्छ।
सैलुङको प्राकृतिक सौन्दर्य अनुभव गर्न दैनिक रूपमा आउने आन्तरिक पर्यटकको उपस्थितिले स्थानीय पर्यटनमा नयाँ उर्जा थपिएको छ।
