भक्तपुर – नेवाः ऐतिहासिक साँस्कृतिक भजन खलःको आयोजनामा नगदेशमा ऐतिहासिक पुलुकिसी नाच २०८२ आज शुक्रबार भव्य रूपमा सम्पन्न भएको छ। परापूर्वकालदेखि जात्राको रूपमा प्रदर्शन हुँदै आएको पुलुकिसी नाच नेवाः समुदायको मौलिक सांस्कृतिक पहिचानको महत्वपूर्ण अङ्ग मानिन्छ।
श्री स्वस्थानी व्रतकथामा आधारित यो नाच परम्पराअनुसार धार्मिक विधिविधानसहित सञ्चालन गरिएको थियो। नाच सुरु हुनुअघि नगदेशको लाछीस्थित श्री सिद्धि गणेश मन्दिर प्रांगणमा भगवान माधव नारायणलाई विराजमान गराई नवराजद्वारा पूजा सम्पन्न गरिएको थियो। त्यसपछि किसी (हात्ती) मा सवार गराई नगर परिक्रमा गर्दै पुलुकिसी नाच प्रस्तुत गरिएको थियो।
यस वर्ष नाचका मुख्य कलाकार जेनिस बाडे रहेका थिए। त्यसैगरी नागचाःको भूमिकामा श्रीजल बाडे तथा सहेली द्वयमा चार्भी बाडे र दीप्सा उपले सहभागिता जनाएका थिए।
यसै अवसरमा स्वर्गीय जगत नरसिंह बाडे स्मृति लाइफ एचिभ्मेन्ट अवार्ड प्रदान गरिएको छ। नाचको संरक्षण, प्रवर्द्धन र विकासमा पुर्याएको योगदानको कदर गर्दै भजन गुरु तुल्सीभक्त घजु र नाच गुरु आशाबहादुर उपलाई सम्मान गरिएको आयोजकले जनाएको छ।
