काठमाडौं – बालबालिकाको मस्तिष्कलाई सक्रिय बनाउने अवाकस प्रतियोगिता सम्पन्न भएको छ । बालविकास तथा एनसीमास संस्थाको सहयोगमा शुक्रबार नागार्जुन नगरपालिका स्थित लिटिल क्लाइम्बर्स इङ्लिस स्कुलमा अवाकस प्रतियोगिता सम्पन्न गरिएको हो ।
शुक्रबार सम्पन्न प्रतियोगितामा ४ देखि ६ कक्षासम्मका विद्यार्थीहरुको सहभागिता जनाएका थिए ।
प्रतियोगितामा स्मरण पौडेल पहिलो हुन सफल भएका छन् भने दोस्रो रोज थापा मगर, तेस्रोमा अर्नभ भुजेल, चौथोमा निश्चल खतिवडा र पाचौं निरुता श्रेष्ठ भएकी छन् । विजयी हुने विद्यार्थीहरुलाई स्कुलले सम्मान गरेको थियो।
अवाकस विद्यार्थीहरुका लागि प्रभावकारी भएको भन्दै लिटिल क्लाइम्बर्स इङ्लिस स्कुलले दुई बर्षदेखि नियमित पाठ्यक्रममा समाबेश गर्दै आएको छ ।
अवाकस प्रणालीले विद्यार्थीहरुको मष्तिस्कलाई सक्रिय बनाई पढाइमा एकाग्र बनाउने, गणितीय हिसाबका लागि क्यालकुलेटरको समेत आवश्यकता नपर्ने हुँदा यसलाई प्रभावकारी मानिएको प्रिन्सिपल दिलिप रेग्मीले बताए ।
शैक्षिक क्षेत्रमा नयाँ प्रयोग गरिएको अवाकसले बालबालिकाको मष्तिस्क विकास, गणितिय समस्या समाधान गर्न सहज बनाउने, ध्यानलाई केन्द्रिकृत गराउने गर्दछ । विश्वका १ सय ३५ भन्दा बढी देशमा यसको प्रयोग भइरहेको छ । नेपालमा यसको प्रयोग १५ बर्षदेखि भएपनि विश्वमा भने यसको प्रयोग २ हजार बर्ष पहिले नै गरिएको पाइएको छ । कतिपय विद्यालयहरुमा यसलाई नियमित पाठ्यक्रममा समाबेश गरी अध्यापन गराउँदै आइएको छ ।